अब घरमै बसेर श्रम स्वीकृति लिन सकिने

काठमाडौं, १५ मंसिर । अबदेखि वैदेशिक रोजगारीका लागि श्रम स्वीकृति लिन वैदेशिक रोजगार विभागको श्रम कार्यालय धाउन पर्ने समस्यमको अन्त्य भएको छ । किनभने वैदेशिक रोजगार विभागले आइतबारदेखि श्रम स्वीकृतिका लागि अनलाइनबाटै टोकन लिने व्यवस्था गरेको छ । वैदेशिक रोजगारीसँग सम्बन्धित प्रक्रियालाई अनलाइन प्रणालीमा लैजान विभागले ई–टोकनको व्यवस्था गरेको जनाएको छ ।

ई–टोकन अर्थात विद्युतीय पालो प्रणालीले श्रम स्वीकृतिका लागि अनलाइन फाराम पेर गर्नासाथ आवेदकले श्रम स्वीकृति पाउने पालो कुन दिन पर्छ थाहा पाउन सक्नेछन् । आफूले कुन कार्यालयबाट श्रम स्वीकृति लिने हो त्यो अनलाइनबाटै रोज्न सकिनेछ । विभागले फारम भर्दा सही मोबाइल नम्बर र इमेल राख्न आग्रह गरेको छ ।

कुन कार्यालयमा छिट्टै पालो आउँछ, त्यो कार्यालयसमेत रोज्न सकिनेछ। जसले गर्दा फाराम स्वीकृत हुने बित्तिकै कार्यालयमा पर्खेर बसिरहनु पर्दैन। अहिले सरकारले सातै प्रदेशस्थित श्रम कार्यालयमार्फत श्रम स्वीकृति जारी गर्दै आएको छ।

श्रम स्वीकृतिको फाराम बुझाइसकेपछि कुनै कारणले तपाईको श्रम स्वीकृति अस्वीकृत हुने भएमा वा थप कागजात पेश गर्नुपरेमा पनि मोबाइलमा मेसेज प्राप्त हुनेछ । श्रम स्वीकृति प्राप्त भएको जानकारी पनि मोबाइलमा मेसेजमार्फत आउनेछ। श्रम स्वीकृतिको फाराम भर्दा पेश गरेको इमेलमा श्रम स्टीकर जानेछ ।

प्रदेश १ को विराटनगर, प्रदेश २ को जनकपुर, प्रदेश ३ को काठमाडौं (ताहचल), गण्डकी प्रदेशको पोखरा, प्रदेश ५ को बुटवल, कर्णाली प्रदेशको सुर्खेत र सुदूरपश्चिम प्रदेशको धनगढीबाट श्रम स्वीकृति जारी हुँदै आएको छ ।